எனினும் அவரே எம்தலைவர்

இளமையில் தமிழக இளைஞர்கள் உளத்தில்
இனஉணர் வதனை எழுப்பியவர்
வளர்ந்தபின் தமது வாழ்வியல் நலங்களை
வளர்ப்பதில் திறமை காட்டுபவர்

எல்லா மக்களும் பகுத்தறி வோடு
இருந்திட வேண்டும் எனஉரைப்பார்
இல்லத் துள்ளோர் பகுத்தறி வின்றி
இருப்பதை ஏற்றுக் கொண்டிடுவார்

ஒருநாள் எனக்கு இந்த நிறந்தான்
உகந்தது என்பார் ஆம்என்போம்
மறுநாள் தொடங்கி அந்த நிறத்தில்
வாங்கிய சால்வை அணிவிப்போம்

மதவா தத்தை எதிர்ப்போம் என்றதை
வகையாய் மறந்து தேர்தலிலே
மதவா திகளை மதித்துக் கூட்டணி
வைப்பார் நாங்கள் மதித்திடுவோம்

என்றும் ஊழலை எதிர்ப்போம் என்பார்
எனினும் ஊழல் கட்சியுடன்
ஒன்றாய்க் கூட்டணி என்பார் அந்த
ஊழலோ டிணைந்து உழைத்திடுவோம்

நானே எல்லாம் என்பார் நாங்கள்
நாவால் ஆமாம் ஆம்என்போம்
தேனாய்ப் பேசிப் பேசியே எங்களைத்
திசைமா றாமல் நிறுத்திடுவார்

காக்கைக் கூட்டம் புகழ்வதைக் கேட்டுக்
களிப்பில் மிதப்பார் இதுஒன்றே
போக்கென வந்து புறம்பேசு வோர்க்குப்
புகலிடம் தந்து போற்றிடுவார்

உலகத் தமிழர் தலைவர் என்போம்
உள்ளூர்த் தமிழரை ஏமாற்றும்
கலையில் தேர்ந்தவர் எனினும் அதனைக்
கண்டுகொள் ளாமல் தவிர்த்திடுவோம்

தொப்புள் கொடியாம் உறவுகள் இழப்பால்
துடித்திடும் போதும் அரசியலில்
எப்படிக் காய்களை நகர்த்தலாம் என்பதை
எண்ணியே நாளும் செயல்படுவார்

ஒன்றே கொள்கை குடும்ப உறவுகள்
ஓங்கிச் செழிக்க உழைப்பதுதான்
என்றே வாழ்வார் என்பதை அறிவோம்
எனினும் அவரே எம்தலைவர் !!